http://bb.is/Pages/119?NewsID=136833
bb.is | 31.08.2009 | 16:47Hjólar gegn einelti
Önfirski skíðamaðurinn Jakob Einar Jakobsson lagði upp í hringferð um landið í morgun. Ferðin er farin til að vekja athygli á því hversu alvarlegt vandamál einelti er og um leið athygli á starfi samtakanna Jerico. Markmið Liðsmanna Jerico er að vekja athygli á afleiðingum eineltis ásamt því að vera athvarf fyrir þolendur og aðstandendur þeirra. Samtökin eiga að vera vettvangur ráðgjafar fyrir þolendur eineltis og aðstandendur þeirra og vinna að fræðslu og miðla þekkingu um málefni tengd einelti. Nafn samtakanna Liðsmenn Jerico er tilkomið vegna þess að Jerico var notendanafn Lárusar Stefáns á netinu, en hann var ungur maður sem tók líf sitt sumarið 2008 eftir að hafa verið lagður í einelti um árabil. Foreldrar hans Þráinn Lárusson og Ingibjörg Helga Baldursdóttir eru stofnendur samtakanna.
„Liðsmenn Jerico tengjast fjölskyldu kærustunnar minnar og ég hef fylgst með frá stofnun og heillaðist strax af vilja foreldranna og ákvörðun þeirra um að fráfall sonarins skyldi aldrei vera neitt feimnismál eins og Þráinn hefur sagt opinberlega, heldur skyldu þau í hans nafni berjast á móti einelti í allri sinni mynd og á öllum vígstöðum. Þau tóku eineltið strax mjög alvarlega þegar það komst upp, ég nefni sem dæmi að Þráinn menntaði sig til kennara og er formaður fræðslunefndar Austurlands og situr í stjórn skólaskrifstofu Austurlands. Þetta gerði hann til að geta haft áhrif og hjálpað fleirum en bara stráknum sínum heima fyrir.“
Áætlað er að ferðalag Jakobs taki um níu til tíu daga en hann ætlar að hjóla 1374 km. Með í för er einn rómaðasti einkakokkur miðborgarinnar í upphækkuðum jeppa með fellihýsi en það er smurbrauðsjómfrúin Jakob, pabbi hjólreiðagarpsins.
Jakob Einar er einn af fremstu íþróttamönnum Vestfirðinga undanfarin ár. Hann var í landsliðinu á skíðum í sex ár og er átjánfaldur Íslandsmeistari í skíðagöngu á árunum 2000-2006. Keppti á HM í Þýskalandi 2005 en hann var sama ár kjörinn íþróttamaður Ísafjarðarbæjar. Hann hefur keppt í VASA göngunni í Svíþjóð og Birkebeinergöngunni í Noregi.
Söfnunarreikningurinn til styrktar liðsmönnum Jerico er: 0323-13-168221. Kennitala: 190783-4059. Nánari upplýsingar um samtökin má finna á vef þeirra á slóðinni www.jerico.is. Fólk getur gerst „aðdáendur“ síðunnar „Hjólað gegn einelti“ á samskiptasíðunni facebook og fylgst þar með hvernig ferðinni miðar.
Á mbl.is má sjá sjónvarpsviðtal við Jakob Einar um ferðalagið.
